Праект “Галасы Утопіі”, прысвечаны выданню цыкла кніг Нобелеўскага лаўрэата Святланы Алексіевіч на беларускай мове ў найноўшым перакладзе лепшых літаратараў нашай краіны, стартаваў 21 лютага 2018 года на краўдфандынгавай платформе “Вулей”. Ён прыцягнуў 231.950 беларускіх рублёў і стаў самым маштабным у гісторыіі беларускага краўдфандынгу, а таксама адным з найбуйнейшых у СНД.
Белгазпрамбанк прыняў удзел у дадзеным праекце і размясціў замову на друк дадатковага накладу ўнікальнага пяцітомнага выдання. Кнігі бязвыплатна перадаюцца ў фонды бібліятэк нашай краіны, пачынаючы з Віцебскай вобласці.
Збор твораў (а гэта 5 кніг) патрапіць як у гарадскія, так і сельскія бібліятэкі.
Распавядаючы аб праекце, старшыня праўлення Белгазпрамбанка Віктар Бабарыка, у прыватнасці, сказаў: “Адносіны да дасягненняў у інтэлектуальнай галіне вызначаюць узровень развіцця краіны і яе магчымасці. Безумоўна, мы ганарымся прызнаннем заслуг беларускага нобелеўскага лаўрэата Святланы Алексіевіч, і наша задача – зрабіць даступным плён яе творчасці на роднай, беларускай мове”.
Для даведкі:
Святлана Алексіевіч – першы беларускі лаўрэат Нобелеўскай прэміі ў галіне літаратуры. Самую прэстыжную пісьменніцкую ўзнагароду яна атрымала ў 2015 годзе “за шматгалосную творчасць – помнік пакутам і мужнасці ў наш час”. У цыкл “Галасы Утопіі” ўваходзіць пяць кніг, над якімі пісьменніца працавала на працягу сарака гадоў: “У вайны не жаночы твар”, “Апошнія сведкі”, “Цынкавыя хлопчыкі”, “Чарнобыльская малітва”, “Час сэканд-хэнд”.
